回想最低落時期真係慘
陳曉東：街市阿婆想摑我！
陳曉東與張栢芝情變後，移情別戀、第三者等一連串是是非非，令他的形象一落千丈，情緒亦陷入低潮，使他覺得連街市阿婆都好像討厭他到想摑他的地步。東東更不諱言當時曾瀕臨精神分裂邊緣，並考慮過退出娛樂圈。
事業篇：我有權繼續唱歌
陳曉東自去年中與張栢芝分手後，負面新聞就一直緊纏住他，跟栢芝離離合合的戀情、被責負心漢、與霆鋒及向華強太太陳嵐掀罵戰、頒獎禮食白果，連個人資料都被盜用以假信用卡在內地瘋狂簽帳，運氣似乎真的差到不能再差了。
是非當人生歷練
陳曉東：東 記者：記
記：經歷咗咁多負面新聞，最近再出新碟有冇擔心過市場反應？
東：唔擔心，日日擔心住都冇用，我做唱片嘅時候只會擔心詞、曲同時間趕唔趕得切。是非都唔係第一次碰到，碰得太多啦。是非對我嚟講等於練功，可能我細個冇練功，所以上天特別優待我，畀啲難練嘅秘笈我練，單單都唔係「人咁品」㗎。其實好多事情都係俾人簡單複雜化，好荒謬，我覺得好有挫敗感，曾經覺得自己係全世界最失敗嘅人。
記：你點面對呢段情緒低潮期？
東：只可以等時間過，但係時間過得好慢，連呼吸都可以數住幾多下。我從來冇諗過自己竟然會變成奸角，好似連街市賣菜嘅阿婆都想摑我一巴咁。無論應唔應該講嘢嘅人，都有意或無意咁講咗啲插我一刀嘅說話，我真係諗過放棄唔做，退出算啦！係好無奈咁覺得頂唔順，對自己變成一個大笑話嘅主角覺得好難堪，點解呢個人咁戇居，撞板撞得咁盡。我本身係藝人，我提供嘅娛樂係唱歌同拍戲，報章上嘅娛樂唔係我想提供嘅，咁就不如唔做啦。
「我唔要做弱者」
記：係乜嘢令你有動力繼續唱落去？
東：有段時間我覺得自己精神分裂，差啲承認所有嘢都係宿命，我懷疑自己嘅存在係咪真係活着，覺得自己生活喺一個地下世界，好黑暗。我試過喺狂風暴雨嘅夜晚去飛車，但係有一日我覺得自己唔想再咁落去，加上後來有段時間我比較多留喺內地拍劇，變咗可以唔出嚟，唔去煩。而且我發現身邊重有家人、經理人、朋友同埋歌迷錫我。我要提起精神，用生命力抗衡宿命，我要自己更加硬淨，我唔要做弱者。我自問做人問心無愧，我唔想回顧，亦都唔係怨，𠵱家提番起只覺得個經歷好好笑。
事實上我好愛我嘅工作，除非市場唔再容納到我，否則我有權繼續做我自己想做嘅事，就係咁，吹咩?!
投入心力做音樂
記：𠵱家算唔算係重新出發？新碟有好成績算唔算係一個好開始？
東：我每日都係重新出發，有好成績當然開心，公司話我知新碟出咗好快有翻單，各方面評價都好好，證明一個人堅持信念去努力，唔好咁易動搖係啱嘅。不過𠵱家有少少好成績唔等於要自滿，條路重好長，我要去重鎚出擊，重要加大馬力去努力搏殺。
記：今次新碟你有份作曲、填詞，係咪憑歌寄意講你同張栢芝嘅感情？
遇挑釁必定反擊
東：創作歸創作，冇刻意寄乜嘢意，我嘅焦點只會放喺工作上，用心寫詞做音樂，唔會用歌嚟講人哋。人哋寫歌畀陳曉東，有啲人鍾意寫傷心嘅歌，有啲人鍾意寫開心嘅，我搵人寫詞都冇刻意叫人寫乜題材。
記：參與作曲、填詞係咪刻意轉路線，做唱作歌手唔做偶像派？
東：我從來冇刻意創作，係好自然嘅事，每個歌手都可以，而且到某個階段都會要求參與，點可以只唱唔投入自己嘅諗法。我唔理乜嘢偶像派、少林派定武當派，都無關㗎。我亦都冇刻意撇除乜派物派，你唔需要幫我定位，我嘅定位就係陳曉東。
記：你怕唔怕再俾是非纏身？
東：我會努力做好自己，總之唔好搞事。如果有人再無啦啦插我一刀，我一定會反擊，總之人不犯我我不犯人，否則我一定還拖，所以唔好再隨便評論我，唔該。