當年今日

彷徨兩母親獲助紓愁困

蘋果日報 2002/02/16 00:00


兩個貧困家庭,面對突如其來的額外開支,頓感彷徨失措。阿娣與三名年幼女兒月前獲配公屋,得以遷離狹小房間,卻愁對一筆龐大的搬遷費;阿玲為方便照顧一對患哮喘的孿生兒子,近日獲恩恤編配就讀同一中學,惟她無力為兒子轉校添購書簿和校服。蘋果日報慈善基金了解過她們的需要後,即時撥款解困。
個案一: 「比起以前幾仔乸迫埋一間房仔,𠵱家地方梗係闊落好多,但諗起要畀咁多按金雜費,就好頭痛。」阿娣歎着氣說。
三十六歲的阿娣,育有三名年齡由八至十二歲的女兒,一家月前喜獲房屋署編配公屋單位,生活得以改善;惟歡欣過後,阿娣卻為龐大的搬遷開支惆悵。「𠵱家屋企連光管都冇錢裝,牆又冇髹,家具、電器都係周圍執番嚟嘅。」

一家五口綜援維生
阿娣的丈夫原任地盤雜工,惟近年失業,一家五口靠綜援金維生,日子刻苦清貧。「三個女讀書,雜費好多,平日都要好慳先維到皮,根本唔會有多餘錢剩。」
為籌措這筆突如其來的開支,阿娣夜夜難眠,精神委靡的她表示:「同啲朋友左湊右湊先勉強可以入到伙,但𠵱家始終欠一個月租未畀,另外,水、電、電話嘅按金都未交,唔知點算。」
有見及此,蘋果日報慈善基金即時撥款一萬元援助阿娣,紓緩其經濟壓力。
捐款編號:C0461
個案二: 面容憔悴的阿玲歎謂:「我好辛苦問朋友借到差唔多五百蚊,幫大孖買咗套冬季恤衫西褲同運動衣服,已經唔夠錢買校褸。早幾日又凍又大風,我惟有叫個仔喺恤衫裏面着多幾件底衫,再加件冷衫同頸巾返學,希望佢千祈唔好哮喘病發,真係諗起都心酸!」
四十一歲的阿玲,早年與丈夫離婚後,帶着一對孿生兒子靠領綜援維生,節衣縮食過活。兩名兒子現年十二歲,同患有哮喘及嚴重牙病。
缺錢買校褸教科書
阿玲皺着眉說:「我有哮喘病,遺傳兩個仔都係咁,每逢轉天氣就好容易氣管唔舒服同感冒,好多時上上吓堂突然唔舒服,要我趕去學校接佢哋睇醫生同返屋企。另外佢哋因為上下顎牙牀天生唔夠大,前排做咗手術後要長時間箍牙去改善牙齒結構生長,每個月都要請好多日病假去睇醫生。」
由於一對兒子去年九月分別獲派升讀九龍及新界區的中學,而同樣體弱多病的阿玲,實難以長期越區到兩個不同地點接送孩子由學校往醫院求醫,阿玲早前遂向教育署申請讓兩兒就讀同一間中學,近日終獲有關方面給予恩恤安排。
惟因缺錢應付兒子轉校的開支,阿玲深感彷徨。「𠵱家大孖轉咗去讀細孖間學校,但我無能力重新買件校褸同啲教科書畀佢,呢度加埋要成二千幾蚊,我哋靠綜援生活真係慳唔到咁多錢出嚟。」
蘋果日報慈善基金了解阿玲苦況後,即時撥款三千元,助她為兒子購買校褸及所需教科書,解其困境。
捐款編號:C0464

暖流熱線
電話:29908688
傳真:23702192
電郵:[email protected]
網址: http://www.charity.atnext.com