孫柏文以前做石油分析員嘅時候，因為受僱於一間比較小型嘅股票行，所以就算每個分析員都專注一個行業，股票行都要我哋同時留意其他一兩個行業。其他行業都有分析員同事專注，不過萬一佢哋病咗或者屋企有事，又碰啱有公司舉行發布會，咁股票行就會派後備分析員出席。
孫柏文以前除咗睇石油業之外，就要留意埋電子傳媒行業同澳門概念公司。有一次，專注電子傳媒業嘅同事病咗，咁啱電視廣播（511）開分析員發布會，所以股票行就叫我Mission:Mars咁去到與世隔絕、冇雷公咁遠嘅將軍澳工業邨，出席喺電視廣播總部舉行嘅發布會。
喺發布會上，電視廣播嘅管理層一開始就講廣告收益有幾勁，跟住再講喺外國嘅租帶賣碟收益又幾咁勁，最後當然講收費電視蝕得好勁。管理層講完之後，就到分析員發問，我當然攞隻金手指出嚟，去篤吓佢哋。我記得隻金手指篤咗兩個問題。第一、如果冇人訂購佢哋嘅收費電視，有冇考慮過用其他收費電視嘅平台，例如iCable或者NowTV去轉播TVB嘅電視頻道？當時我仲後生，不知天高地厚，思想簡單咁諗，如果觀眾睇你個台，就好似乘客搭你架巴士，又使唔使要限住架巴士，一定行自己起嘅高速公路呢？

產品贊助先至掂

當時，管理層講咗一大堆對TVB收費電視非常之有信心嘅說話。點知過咗兩年，TVB真係將佢哋嘅電視頻道擺上NowTV，都證明咗，金手指篤唔醒嘅人，漢傳媒嘅陳國強篤得醒。勁！
第二、就係面對住咁多人用互聯網下載TVB嘅節目，而下載嘅節目又已經俾人攞走咗啲廣告，電視廣播有冇計劃做多啲「產品贊助」（ProductPlacement）？即係想落廣告嘅贊助商，唔再賣傳統嘅廣告，而係將產品直接融入節目裏面。例如賣「有香味」洗頭水嘅公司，可以同TVB合作，拍攝個劇集，講一個唔起眼嘅女仔，憑洗頭水嘅香味，釣到個喺投資銀行做嘢嘅金龜婿。就算相信世界仲有浪漫嘅外國觀眾唔受落，都仲有香港嘅觀眾蜂擁咁去買嗰隻洗頭水，咁到時贊助商都會支持產品贊助呢個概念。管理層當時嘅回答，我都已經唔太記得，好似淨係重複再重複咁講：「大力反盜版，我哋會大力反盜版！」

咁𠵱家，香港兩個電視台都有做產品贊助，有冇錢賺就佢哋先至知；但傳統廣告收入喺度收縮，就好多分析員都知。如果電視廣播管理層想安撫啲分析員，最好就係將產品贊助嘅收入，同傳統廣告嘅收入分開，等啲知道佢哋將來要靠產品贊助嘅分析員，可以有數據建議投資者買入電視廣播嘅股票。

揠苗助長變荒涼

最後，孫柏文就畀想做產品贊助嘅贊助商一個貼士。我見過最終極兼最有效運用產品贊助嘅產品，就係前宗主國吉普車品牌RangeRover。話說當年，花旗國南加州地區賣RangeRover賣得好慢，一個月賣得一兩架。點知有一日，有個悍匪被追捕嘅時候，突然喺公路邊騎劫咗一架RangeRover，架車就被警員開槍射，又重複攀越公路中心嘅石躉，搞到部車啲輪胎爆晒，其中一個後輪被射到剩番個煞車碟拖住走，架RangeRover一路走就一路爆出火花。不過架車都一路照行，警員最後要追多幾十哩，先至追到。
翌日，RangeRover喺花旗國南加州地區即刻賣斷市。
所以貼士就係，賣廣告有時無心插柳柳成蔭，揠苗助長變荒涼。
孫柏文