廖秀冬局長算係董建華內閣中失分較少嘅一員，呢個可能同佢人緣好、夠坦誠有關。噚日佢向八方及一班行家推銷交通費可加可減機制，八方順便問佢7.1去咗邊。
冬冬話佢嗰日喺屋企睇電視直播，唔係話認叻，佢一早已經估到7.1會有好多人上街，因為周圍好多人都呼朋喚友一齊去，唔少重係第一次上街，所以計一計，就估到一定比舊年年底反23嘅五萬人多好多倍；佢當時喺早禱會估有三十萬。
如果冬冬做埋一哥個份就更好，因為佢話一定會收番話入維園先計數嗰句，等大家唔好迫爆銅鑼灣。冬冬又話田少突然辭職，佢俾人喺睡夢中叫醒返政府總部開會，都好難忘。

工程畢業生可實習
冬冬係梁錦松港大同學，大家都係七三年畢業，佢話阿松辭職之後都有一齊食飯，呢位前財司已經冇乜事，重笑話𠵱家每日瞓醒，發覺唔使再俾財赤煩住，可以再瞓過。
阿松退下，冬冬重有漫漫長路，要起港珠澳大橋，又要完成西部通路，至於中環沙田線，就因為人口增長慢，分分鐘要押後。
佢亦好體諒啲後輩，話讀工程嘅大學生一般都好叻，一畢業就冇嘢做好慘，所以政府決定請百五個畢業生，等佢哋有機會實習，人工少一截，得一萬蚊多啲。四年之後，就各安天命喇。



傳真︰2623-9278
電郵︰[email protected]