全城哄動嘅紅磡海名軒，長實今日公布銷售詳情，今次重罕有地同兩大代理行中原及美聯代表一齊亮相。
新地同信德嘅西半山寶翠園，出動到跳水皇后伏明霞同送名車，過去幾日銷情唔錯，消息人士對蘭西講，舊年推出嘅第5座有價講，聽講最少可以減2至3%，若果想平多啲，就要睇個客夠唔夠牙力，據聞已經有買家成功攞到超過3%折扣。

曉峯代理怨被搶客
房協馬鞍山曉峯灣畔，有未獲委託的代理行為買家免費碌卡落定，並經美聯入票，佢嘅對手中原地產班經紀反應激烈，蘭西聽講背後原因係當個客想入多張票，但又唔夠錢嘅時候，以往可以透過碌卡就搞掂，但𠵱家冇得咁做，變成「蜑家雞」，但對手就可以乘機幫個客碌卡入多一張票，分分鐘連個客都俾人搶埋，咁就認真唔抵。
近排樓市好景，地產代理行收入水漲船高，中原地產4月份佣金收入近1.06億元，連續兩個月過一億，亦係99年3及4月以來，首次再有連續兩個月過億嘅紀錄。旗下利嘉閣，主力做二手嘅西貢同南區分行，4月份佣金收入都過100萬元。
蘭西