當年今日

黃皮紅肉西瓜

蘋果日報 2002/05/30 00:00


黃色果皮嘅西瓜並唔係新品種,喺早兩、三年前我已經食過,呢款黃皮西瓜,果肉同一般西瓜無分別,依然係紅色,呢種品種主要嚟自台灣,由於佢黃咁咁嘅色澤,台灣人統稱佢為金美人,Size唔大,一個最重大概只有五磅多,食味唔錯,清甜多汁,最緊要係核唔多,暫時喺超市至搵到。
夜香花提早登場
夏天煲冬瓜湯又點少得加夜香花,佢種獨特香味,同冬瓜好合拍。
每年六月至九月底係夜香花盛產期,呢幾日我行過部份菜檔已經可以搵到佢,不過價錢稍為貴咗啲,一斤要三十零蚊,不過因為夜香花多用嚟滾湯,用量唔會多,大家每次可以買二、三両返去配冬瓜煲湯都可以㗎啦,可以令啲湯好味啲,計落都唔算貴啦!
馬友焗製香口
馬友魚好鬼大條,分分鐘有成八斤重,買嘅時候當然係斬件買。呢排多咗馬友賣,我肥師奶耐不耐都會買啲做餸。而其實唔好見馬友咁大條就以為啲肉一定好粗,其實食落都算幼細,而多脂肪的就最適宜用焗製嘅方法去煮。用少少鹽醃幾個鐘,用錫紙包好,焗熟加牛油就非常香口,保證小朋友一定鍾意食。