社聯第二年推出嘅「商界展關懷」計劃，《蘋果》再次獲提名，同滙豐、恒生、中銀、大家樂、麥當勞、商台及無綫等四百九十三間機構，一齊獲頒呢個榮譽標誌，表揚大家對社會嘅關懷。社聯噚日重搞咗個頒獎禮，請到阿董任主禮嘉賓。
其實《蘋果》由九五年創刊冇幾耐，就成立咗「蘋果日報慈善基金」。評審指《蘋果》唔單止捐錢，重捐埋人手，又呼籲大眾捐錢，近幾年重拉埋啲商家做直接服務，冇錢配眼鏡嘅人，蘋果基金就搵間眼鏡公司贊助佢。
舊年沙士肆虐期間，壹傳媒集團首次賣報賣書籌款，與讀者同心支持抗炎行動，而蘋果基金同社聯及社會服務機構亦搞咗一啲幫弱勢社群嘅抗炎計劃，撥款超過二百八十萬。


傳真︰2623-9278
電郵︰[email protected]