當年今日

一味窩輪:電盈Call輪提前係咁先

蘋果日報 2002/09/14 00:00


美股不妙,港股又係,電訊股慘情,聯通(762)、電盈(008)同中移動(941)依次唔見5.4%、4.8%同2.2%。聯通同中移動嘅窩輪,重有唔少買賣,電盈窩輪則幾乎一片空白。
電盈Call輪有11件,但只有兩件有交易,但金額加埋唔夠兩皮嘢。大部份都係1仙至1.3仙,成個提早係咁先格局。鬼咩,行使價平均大約2元,睇吓正股得1.19元,要喺兩三個月內正股升80仙,真係非常渺茫。
若然認為電盈因超賣而想博反彈,冇1隻電盈Call輪揀得落手,除咗成交太細外,就係溢價好高,冇辦法,正股愈係跌,啲窩輪愈係價外,溢價就愈高。溢價最低嗰件9417,都去到54%。

9421冇乜放大效應
博8號仔有技術性反彈,都只係適宜直接揸正股,不過呢種做法好高難度。怕正股彈完之後,又有其他小股民止蝕甩咗個秤砣,股價一級級落。
然則,若然睇8號仔仍然有得跌,諗吓啲Put輪又如何?
Put輪有9136同9421兩件,9421現價50仙,近排升咗好多,平水咁滯,不過槓桿率2.4倍,冇乜放大效應,交投極疏,賭落去又係冇乜意思。
章 盛