當年今日

股海實戰錄:新地可趁勢短炒

蘋果日報 2002/01/30 00:00


期指結算前夕,港股重上萬一點,重要係靠電訊股帶動反彈,好友果然神乎其技。有老友話,如果唔係咁,啲輪點樣搵人買?
噚日表現最搶眼當然係中移動(941)同和黃(013),雖然有人唔同意佢哋上升嘅理由,但一樣照升畀你睇。
和黃噚日升破50日線(現處74.40元),屬轉勢訊號。不過,霸菱對於和黃收購環球電訊有保留,調低和黃2001年盈利預測27%,投資評級降至持有。睇圖買和黃Call輪要留意好淡鬥法嘅情況,慎防中招。至於中移動,愈嚟愈覺唔係一般人玩嘅股票,更何況窩輪呢!

小敲滙豐輪9030
大市如果繼續反彈,相信滙豐(005)唔能夠唔升,如果升穿20日線89.60元,將上試50日線92.10元,雖然正股水位唔太吸引,但窩輪就相當和味,比聯滙豐備兌認購證9030數據最靚,可以小敲。買正股則揀新地(016),新地係強勢藍籌,噚日重上50日線(現處63元),如果升穿65元,又會再試吓70元。近期樓盤好賣,新地上升都算出師有名,係較有短炒價值嘅藍籌股。