近期馬圈盛傳苗禮德馬房將有一批馬離巢，倉主為了穩定軍心，贏馬當然最實際。事實上，苗禮德今季的谷草夜賽成績不俗，近三次谷戰兩度起孖，其中包括4月20日勝出「破風者」及「旅遊多寶」，前駒周三（10日）晚又角逐四班1200米，有望為苗禮德添食省靚招牌。

四歲的「破風者」原本隸屬呂健威馬房，上季兩戰表現平平，今季一直有做操練工夫，3月8日轉廐時，原本已報名列正選，寧願排位前棄權唔跑，都即刻拉倉轉投苗廐，情況比較罕見。

「破風者」加入苗廐第二天，即恢復操練，反映此馬的健康及狀態完全沒有問題。上仗轉廐及季內初出跑谷草1200米，臨場着綠格落到4.7倍，結果在史卓豐胯下擊敗季內識贏的「金飯碗」及「勁皇子」，贏馬時間1分09秒89拍得住同晚三班頭馬「秘密武器」，但姿態更加輕鬆。

苗禮德處理來投馬手法向來急進，作風喜連珠炮發，如今季接手孫達志寶藏「事勝意」，首四仗獲取兩冠兩亞，最近再於三班入Q。

「破風者」贏馬後加至56分，今場可繼續跑四班，賽後苗禮德接受訪問時直指此馬出賽經驗尚淺，肯定仍有進步空間，今次對手無多，執埋有利4檔，有力再下一城。