今年秋季，相信會係福士車迷最開心嘅日子，皆因一直有傳快將推出嘅新一代Golf車系，將會於今年秋季正式登場，相信屆時定惹來不少車迷注視。
從廠方發布嘅相片中可以睇到，屬第五代嘅新版福士Golf，造型可謂十分吸引，當中一對全新設計嘅雙圓頭燈組合，襯以同屬全新設計嘅鬼面罩及頭泵把，看來帶有點同廠Phaeton頂級豪華轎車嘅味道；而新款闊大尾燈配搭，亦能給予尾隨車輛明確提示呢！就連新車嘅車廂布局亦屬全新設計，而且更會隨不同版本而略有不同，以迎合不同用家需要；設備方面，除有原廠冷氣及高級音響外，兼且重有多個安全氣袋，以保障車上乘客安全呢！
除此之外，車身闊度較舊有型號增多24mm（達1759mm）、高度增加咗39mm（達1483mm），與及車長亦達4204mm（較舊有型號增多57mm），從而為車上乘客帶來更寬敞舒適嘅乘車環境。
新車於推出初期，將有兩台分別有75匹及115匹馬力輸出嘅電油引擎供用家選擇；而懸掛系統亦經過悉心改良，以增強車子嘅路面循迹性呢！有興趣嘅車迷，不妨留意日後我哋嘅報道喇！