馮仁昭四圍超：陳百強50歲冥壽　全家出動悼念 - 馮仁昭

蘋果日報 2008/09/08 00:00

九月七號係陳百強（Danny）嘅50歲冥壽，前晚過百名fans喺灣仔舉行「永遠．紫愛陳百強紀念晚會」，除咗fans出席之外，Danny嘅爸爸媽媽、哥哥同家姐都有出席，而當年曾經為賭債纏身而煩惱嘅Danny媽咪，樣貌冇乜大改變，保養得非常好。
前晚翁靜晶同埋好朋友林珊珊亦有到場紀念故友，當翁靜晶見到Danny嘅爸爸更加一時感觸喊咗出嚟，之後佢哋更加相擁而泣。
「好似冇離開過」
Danny嘅家姐陳小儀話見到咁多fans仲未忘記Danny，而且仲花時間專登搞呢個紀念晚會，令佢覺得好感動，佢話：「唔經唔覺已經15年，估唔到仲有咁多人痛錫Danny，好似佢冇離開過大家咁樣，真係好感動同好開心。」
至於林珊珊就話同以前Danny生日嘅時候慶祝冇乜分別，佢話：「屋企人問我去邊度，我話去Danny嘅生日會，而差唔多到會場嘅時候我個心跳得好厲害，感覺好興奮好感動。」
empty
林珊珊（右）前晚抽空出席Danny嘅悼念活動，乘機懷念故友生前嘅點滴。
empty
紀念活動上擺放咗唔少關於Danny嘅剪報同紀念品，fans趁機會影相留念。
展出珍貴收藏品
除咗香港fans之外，當晚仲有台灣fans出席，而且現場展覽咗fans多年嚟收藏嘅珍品，其中有個係演唱會飛碟，擁有呢隻飛碟嘅fans話：「隻飛碟係1982年Danny喺灣仔伊利沙伯體育館舉行首個演唱會嘅時候派嘅，好有紀念價值。」
empty
翁靜晶前晚一見到陳父，攬住佢大喊，場面感人。