數中國傳統文化，茶道一定榜上有名。茶道文化在中國源遠流長，學問甚廣。茶，除可品味細嚐之外，亦不乏茶葉入饌的菜式。國金軒今次找來華芳茶莊提供優質茶葉，推出全新「貢茗住餚譜」，8款名茶創製多款佳餚，以不同茶葉香味帶出佳餚另一種味道。還引入了法式元素，點止茶味咁簡單。

記者：王震遠
攝影：林栢鈞
模特兒：Shanna@StageModels

以茶入饌考功夫

茶葉入饌並非新鮮事，但數坊間肯做茶葉菜式的餐館其實不多，皆因掌握茶葉與菜式之間味道平衡並不容易，當中技巧，是要針對不同茶葉的特質，使用相符的烹調方法。所以必先要對各款茶葉味道和特質深入了解，清楚其合適配搭的煮法和食材，才能將茶香的特色發揮得淋漓盡致。除此，師傅的手藝也很講究，溫度必須控制得恰當，更要掌握茶的濃度。茶味太濃，會令菜式變得苦澀；茶味太淡，又帶不出菜式味道來，弄巧反拙。
以「法式片皮茗熏雞」為例，賣相設計雖然好像很簡單，想不到背後的製作過程比想像中仔細繁複。在廚房企足接近半個鐘，睇足師傅準備此菜過程，見師傅咁有heart，不應埋沒一番心血，應該將背後付出的努力呈現出來。

法式片皮茗熏雞半隻$200

諗頭煞食，賣相更是吸引。中式片皮雞Crossover法蘭西多士條橋又的確夠出位，味道當然亦非常出色。初入口未嚐其味，先品茶香，雞肉爽口帶銀針白毫茶葉煙熏過的味道，底層西多士搭老拍檔芝士，加菠蘿帶幾分鮮甜，一層一層慢慢食出各種味道，充滿立體感。

紅棗茶葉鴨半隻$180

選用不肥不瘦「番鴨仔」，用鹽醃一晚，連馬騮搣同紅棗一齊煲熟再炸，入口果然份外酥香，茶味絕不會蓋過鴨味。

Shanna：「味道比較濃，鴨肉食得出好香口，食完口腔仲留有茶味。」

單欉玉乳翅每位$450

底層墊有比豆腐花更滑的蛋白，原來蛋白混入鳳凰芝蘭單欉茶葉一齊蒸熟，滑之餘帶有一絲絲茶香。主菜是針長彈牙的牙揀翅，入口清香軟滑。

Shanna：「咁大啖翅食得好滿足，加埋下層蛋好滑，食得出明顯清香茶味。」

黑魚子茶鹽溏心蛋$88

溏心蛋是以普洱茶葉熏鴨蛋，蛋面帶茶香。伴少少魚子醬，再點些帶茶葉末的海鹽入口，很獨特。

東山珍珠龍蝦球原隻$820

新鮮龍蝦起肉，放碧螺春、調味料同鹽炒至八成熟，既能品嚐茶香，亦能保持蝦肉鮮味。

國金軒（23933933）
中環國際金融中心商場三樓3101店