公僕去年經歷幾許風雨，被減薪、又被削人手，公務員事務局局長王永平噚日同記者春節茶敍，佢話希望猴年大家「一團和氣」。不過，有記者祝佢「步步高陞」時，佢即刻面色大變，耍手兼擰頭猛話唔好，重話「高處不勝寒」㖭！「步步高陞」唔啱聽，可能「步步為營」啱聽啲啩？
特首喺施政報告話希望畀市民休養生息，王永平噚日又話今年唔會考慮強迫遣散剩餘人手，只會諗吓一啲自願嘅措施解決人手太多問題。
十七萬公務員今年都希望可以唞吓氣，之但係，王永平又話，猴年係「甲申年」，諧音係「革新年」，唔……呢啲係咪叫暗藏後着呢？


傳真︰2623-9278
電郵︰[email protected]