終於決定唔再選人大嘅曾憲梓，自己退下來，但唔代表唔為國家效力，政界風聲傳曾家細仔智明想做政協，二仔智雄就想選人大，一於子承父業。曾常委噚日招呼記者去佢九龍塘大宅食飯，席間佢話智雄冇同佢講過參選，若然個仔去馬，做老竇嘅實支持。

曾常委話做公職有時要犧牲吓，如果智雄做咗人大，唔多唔少會影響金利來生意，但佢覺得唔係問題，事關行政治就要賣埋身，唔計較得咁多，好似佢自己咁，年年捐錢返大陸都冇望回報，總之就係一世擁護共產黨。呢片赤膽忠心，𠵱家好難搵咯。不過曾常委講到明，唔會為智雄打電話拉票，事關自己選時都冇四圍拉票，所以好低票當選，差啲選唔到咁滯。老竇得把口，睇怕智雄想跑出，要加多幾錢肉緊自己執生。
多年前換腎嘅曾常委𠵱家身體幾好，噚日親自下廚整咗鹽焗雞、炒粉炒麵同肉骨茶款待記者，記者做客畀面要食，曾常委冇戒口都好食得，佢話已經睇化咗，「食又死，唔食又死，做飽鬼好過做餓鬼。」曾常委嘅新抱小恩子噚日都有現身，仲帶住四歲囡囡凱栭Sheree同兩歲囝囝浩儒Tyrone見記者，小恩子keep住青春美麗，嫁入豪門就有呢個好處。