巴打們愛買波鞋並非新事，因為冇買樓買車入場門檻咁高，市場流通量同需求又有，買來自己着或紀念都保值。揀波鞋最重要舒服適合腳形，炒波鞋就要揀中款式。
近排美國人氣運動體育股Under Armour（UA）季績放榜，繼續食住咖哩仔Stephen Curry條水進攻，銷售飆三成，亦是連續27季錄得雙位數增長。美國掛牌11年嘅UA，股份一拆二為A類同C類股票（無投票權），主要確保創辦人Kelvin Plank對整間公司控制權。新星UA冒起，少不免與同門大師兄Nike比較。截至今年首季的12個月，UA股價跑輸Nike，UA只升15%；Nike升幅有三成。但後浪優勢就是潛在爆發力強，攤開過去四個季度計，UA銷售增長明顯拋離Nike，UA每季開出雙位數，增長介乎兩成半至三成。Nike季度銷售增幅有4.7%至7.7%。
如果10年前已經識貨買入UA，平均每年回報兩成七。若同樣長揸Nike 10年，平均回報只有兩成。短線睇持貨5年計，UA同Nike回報差別拉得更闊，UA平均回報約35%；後者只有26%左右。現價計Nike嘅PE為30.59倍，UA嘅PE有86.97倍。雖然UA市盈率相比下顯得偏貴，但配合強勁銷售增長，比大師兄前景睇高一線，點都繼續追住咖哩仔。

Captain Cool
本欄逢周一刊出