當年今日

專注法網懶理足球事
求驗客手記:阿加斯世盃盲

蘋果日報 2002/05/30 00:00


英式足球喺美國雖然唔係太流行,但假假哋美國都連續四屆打入世界盃決賽周,但該國網手阿加斯竟然話唔知世界盃係乜!
𠵱家打緊法國網球公開賽嘅美國球手阿加斯,早前參加羅馬網賽嘅時候,有記者問佢,會唔會抽時間睇今屆世界盃決賽周,順便幫美國隊打氣;但係佢竟然答唔知世界盃係乜。
英式足球喺美國的確唔及網球咁受歡迎,不過美國隊連埋今屆都入過七屆世盃決賽周;其中有部份球員好似鍾斯同埋隊長雷拿咁,今次更加係第三次參加世界盃,所以阿加斯嘅「無知」,反映出美國推廣足球運動似乎唔係太成功。
但阿加斯唔學似伊雲尼斯域同費里路等要分心睇波,可專心打今屆法國公開賽,咁球迷估冠軍時不妨向佢埋手囉。

巴西公僕睇波大過天
足球係巴西國技,連總統卡多佐都話喺世盃期間,將公務員返工時間由早上十點至下晝五點,改為中午十二點至晚上七點,方便佢哋睇波,咁體恤人民嘅政府去邊度搵?香港就肯定唔得,而梳打埠就更話如果公職人員被發現因為睇波而影響工作,就會受到處分,可謂同人唔同命。

堅尼改口風好落台
喺禮拜一先至話想歸隊踢世界盃嘅堅尼,前日又改口風,話唔會參賽;但係計我求大俠話,堅尼九成九知道班愛爾蘭球員一致反對佢歸隊,而俾佢用粗口鬧嘅領隊麥卡菲亦擺出一副強硬態度,唔歡迎佢回頭,佢咪費事到時落唔到台,咪索性自己話唔玩囉。
湖人孖寶綁手綁腳
噚日湖人對帝王場波球證執法特別嚴,搞到兩隊好多球員去到末段都四、五犯在身,其中湖人嘅奧尼爾同拜恩犯規過多;不過生死關頭又唔可以換佢哋休息,搞到佢兩個打到綁手綁腳,最後梗係輸波喇!

史杜阿高域無料到
喺呢個回合因足踝受傷一直唔見人影嘅史杜阿高域,噚日終於出場,點知佢完全無料到,成場波只攞到兩分;明知佢無狀態重要佢出場,帝王教練艾杜文認真靠害。好彩臨尾用番卜比積遜守高比仔,否則以史杜阿高域嘅狀態同防守技術,隨時掉番轉係高比仔帶領湖人贏波!

英球迷專心禁慾打氣?
英國有項調查話啲男性球迷喺今屆世界盃上,會喺英格蘭比賽前一晚自行禁慾,好讓自己專心幫國家隊打氣。不過,我求大俠就覺得佢哋咁做,一半為國家,一半係為自己。事關好多人都好迷信,認為賭之前唔好「搞嘢」,話咁樣會影響賭運喎。