好多人都想知道，互聯互通對香港有乜影響，其實，睇電影圈的發展就可以估到，合拍片就係互聯互通的鼻祖﹔2003年簽完CEPA之後，香港電影人突然見到內地13億人的市場。嘩！發達囉！不過，開心沒多久，發覺香港電影一時之間未適應到大陸市場，香港人又嫌內地戲老套，可謂兩頭唔到岸，結果，一大批香港電影工作者陸續轉行。
點解？梗係喇，內地人博到盡，人工又平，你要離鄉別井，言語又唔通，習性又唔同……（下刪二百字），一句講晒，你好難爭，大陸市場咁大，點解要開放益你？其實邊係益你吖，只係內地電影當年難登國際舞台，香港可以作為一條橋，幫佢哋邁向國際，所以，能夠帶起內地演員的一線男神，個個賺得盤滿缽滿，其他的通通讓路。
金融圈都一樣，互聯互通，股票又好，期貨又好，都係內地股改同人民幣國際化等等的一條橋。起初幾年，我哋係會有唔少機會，但慢慢就會感到被淘汰，梗係喇，內地人博到盡，人工又平……（又係下刪二百字）。他日內地證券行搶市場，行零佣金時，香港靠佣金食飯的經紀，就正式玩X完。
之不過，被淘汰其實唔怪得人，當年電影圈黃金年代之後，片越拍越爛，毫無創意﹔賭精、賭鬼、賭怪、英雄好漢、好漢英雄、好英雄漢，長此下去，本來就係死梗，而合拍片只不過係加速呢個過程﹔唔少金融人亦係不學無術，基本分析就剩識講P/E，技術分析就係跌穿20日線止蝕，被淘汰已是必然。
當然，又唔使咁快灰心，正如阿澤話齋，佢都可以拍超過100部電影，而互聯互通之後市場大左，有實力嘅人係更有發揮空間，好似以前一部戲拍七日，點會有人好似張家輝為部「激戰」去練半年練到咁大隻？我相信行得零佣金嘅服務通常係有限公司，若然你今日肯痛下苦功，咁隨住市場擴大，一定會有更多容戶要搵你做投資顧問，唔使憂。
乜話？你又唔係做電影，又唔係做金融，所以唔關你事？吓？你以為互聯互通只限電影、金融？你就真是儍的嗎？方方面面都殺到埋黎喇，再唔力爭上游，就真係「香港人，玩X完」﹔只要痛定思痛，急起直追，X的廣府話發音咪就係「唔」囉。
張士佳