一提緋聞男友口窒
官恩娜擇偶三式Fit晒吳卓羲

蘋果日報 2005/05/20 00:00


官恩娜(Ella)日前大談擇偶條件,表示理想男友要厚唇、孝順及喜歡寵物,其緋聞男友吳卓羲竟正好全部符合,Ella提起對方時還即時口窒窒。
官恩娜早前為關智斌(Kenny)的新歌MV擔任女角,事後Kenny大讚她洋溢性感味道,不過日前Ella接受本報電話訪問時,卻表示自己完全欠缺性感條件。
Ella說:「多謝Kenny讚我,我同佢識咗好多年,大家兄弟嚟㗎,互讚啫。我就唔覺自己性感,我嘅性格同性感都扯唔上關係。」問Ella覺得自己最性感的部位在哪兒?她即笑說:「唔知呀?但一定唔係個胸,我冇胸嘅,瘦嘅時候咪係對腳囉。」
「厚唇好錫啲」
Ella揚言鍾麗緹和舒淇才是她眼中的性感女星,她說:「我超鍾意鍾麗緹,佢嘅嘴唇、胸、膚色同對眼都好靚,而舒淇就係嘴唇同身材都好正。」
Ella對厚唇女星情有獨鍾,未知她又會否希望男友同樣擁有性感厚唇?她便說:「唔好太薄,錫都好錫啲吖嘛,個嘴有少少肉好啲,同埋要孝順、鍾意動物,我都鍾意動物,大家至有共同嗜好。」
不過,自稱沒男友的Ella,所講的擇偶條件竟與緋聞男友吳卓羲十分脗合,吳卓羲不只唇厚,而且很疼錫家人,又有養魚及養貓狗的嗜好,Ella聞言竟即時口窒窒說:「佢厚唇咩?我又唔覺喎,冇乜印象。」
只認是朋友
吳卓羲既符合其擇偶條件,問Ella對他有否觸電感覺?她的態度即與談Kenny時有天壤之別,𠵱𠵱哦哦說:「吓?朋友囉,冇乜特別,總之冇呀!冇呀!」
採訪:朱倬誼 攝影:陳偉權
服裝:Morgan 場地:ClubRegency
empty
官恩娜的擇偶條件包括孝順、喜歡動物和唇厚,跟她傳緋聞的吳卓羲統統符合條件。
empty
吳卓羲(左)
資料圖片
empty
官恩娜雖為珠寶店太子女,但堅持自力更生,甚有志氣。