馮仁昭四圍超
小恩子揀平婚紗慳得就慳

蘋果日報 2002/03/20 00:00


黎瑞恩(小恩子)前日下晝同助手以及一位男性友人喺尖沙嘴奇峰婚紗店出現,該店婚紗低至一折發售。
只見小恩子喺店內試穿咗一件宮廷式嘅婚紗,亦試埋頭紗同手套,莫非係為咗自己嘅婚禮兼夾知道婚紗店大減價,而試定婚紗?不過小恩子試嘅婚紗款式略為保守,唔通小恩子怕未來老爺曾憲梓唔鍾意佢性感?

連頭紗都試埋
試完婚紗,小恩子同店員傾佐一陣後便步出店鋪,佢一見到記者就話:「我唔係為咗結婚嚟試婚紗,我嘅演唱會都可能會着婚紗。」記者問佢點解連頭紗都試埋,佢就話:「咁演唱會都可以戴埋頭紗㗎嘛!」問小恩子是否五月結婚,到時可會着婚紗?小恩子話在考慮中,未有決定。

Mango、VRF熟食檔撐枱腳
樂壇新人Mango、小室哲哉徒弟Zoie同樂隊VRF嘅其中兩名成員,一行四人前晚去咗北角渣華道街市熟食中心食飯。嗰日Mango、Zoie同VRF嘅成員,佢哋坐喺張圓枱度,叫咗好多餸菜,但唔知係咪俾記者發現,所以佢哋好快食完就走人。
車婉婉一見劉丹胃痛
車婉婉噚日喺電視城度拍《皆大歡喜》,佢話喺《皆》劇會扮皇妃,屬於奸角。問婉婉驚唔驚觀眾唔接受佢做奸角,佢話:「唔驚,李香琴拍奸角都好成功。但係我第一日開工時,因為要同啲前輩,好似苑瓊丹同埋劉丹一齊拍,搞到我驚到胃痛,拍劇嗰陣重撞瘀咗㖭呀!」

羅慧娟投訴開工冇車位
羅慧娟噚日返電視城,佢一見記者就投訴開工經常冇車位泊。娟妹話:「我次次想泊車都話冇位,但其實有好多位剩。」就娟妹嘅投訴,記者轉述畀外事部助理總監曾醒明,佢話:「可能保安派晒啲泊車證,又或者啲藝員唔係即刻泊車,而將架車揸咗去洗。」

周杰倫現身深圳頒獎禮
北京一間製作公司今個月二十三號會喺深圳大劇院舉行「第二屆音樂風雲頒獎禮」,擔任頒獎嘉賓嘅聽講有曾志偉、譚詠麟、鍾麗緹同秦海璐等;而有得獎並會出現嘅歌手據講就有周杰倫、趙薇、任賢齊、古巨基同范曉萱等等,相信到時定必星光熠熠,場面熱鬧。

蒙嘉慧新車七日鮮
蒙嘉慧(YoYo)、錢嘉樂同鄧萃雯,昨日為無綫新劇《華克探案》舉行開鏡拜神。YoYo自爆前幾日撞車嘅經過,佢話:「我前幾日唔小心撞咗架新車,架車重啱啱落地七日咋,架車𠵱家拎咗去整,要成萬蚊!我已經好唔開心,嘉樂仔重成日提起件事,真係好衰。」