當年今日

【騎師梁家俊太太】J2直播節目咆哮爆粗!
索女主持阿Kit遭停職

蘋果日報 2016/10/23 00:00


依家咩年代呀,講粗口、扑嘢當然唔係男人專利,繼靚靚游議員話搵唔到地方扑嘢後,另一位靚女阿Kit李潔瑩,喺10月16日沙田賽事主持J2台直播賽馬節目期間,疑似同另一主持王若舜嗌交,阿Kit未熄咪就大聲咆哮:「Sorry,我冇L……」講完個L字跟手被滅聲三幾秒,節目突然又穿崩,王若舜爆咗句:「咁邊個辣起先吖!」


爆粗事件惹起網上熱話,據知唔少觀眾向馬會投訴阿Kit爆粗,馬會亦立即有相應行動(節目是馬會製作再以買時段形式在J2播放),由今期周日(23日)賽事起,將涉事兩位主持暫時停職,唔使佢哋再做直播,直至另行通知,暫由另一馬評家朱鎮輝頂替佢哋職務。

其實上述兩句穿崩出街冇頭冇尾,好多人唔知發生乜事。經查探後原來阿Kit同王若舜素有積怨,當日王若舜疑似開汽水,啲泡沫濺到阿Kit成身同手袋都係,跟手阿Kit心有不甘,亦以汽水還擊互濺,之後遂出現上述一幕爆粗。

阿 Kit喺馬圈公認靚女,亦騎師梁家俊太太,佢哋今年七月先結婚。而王若舜就係前騎師,掛靴後轉任馬評家。應屆港姐馮盈盈早前亦被揭發爆粗,不過唔係電視直播節目,當然冇阿Kit咁大鑊啦!不過阿Kit有老公仔養,咪當休息放吓假囉!