當年今日

  馬時亨「鞠」到病 - 李八方

蘋果日報 2002/09/14 00:00


財經事務及庫務局局長馬時亨真的病了?噚日仍然返唔到工,有人擔心馬仔會就此不幹,但係八方就認為唔會。任何事情均有個適應期,官場之複雜,為官之困難,馬仔還須鍛煉。
一位馬仔嘅同情者更對八方話,馬仔病得有道理;佢商界出身,雖然見過大風大浪,但係肯定未試過被千夫所指,連續受打擊,壓力咁大,真係唔易承受,唞吓再上戰場都啱嘅。

阿松頭馬想代孭鑊
八方亦覺得佢值得同情,相信只選擇六家傳媒道歉呢啲屎橋,肯定唔係佢老哥嘅主意;阿松嘅頭馬Raymond譚志源已經話咗會一力承擔。唉,平日習慣咗選擇性放料,習非成是,卒之搞出個大頭佛!
聽聞事發當日,馬仔嘅新聞秘書Louisa麥麗雲話唔到事,咁邊個話事呢?班新聞官個個欲言又止。至於Louisa,害到老細咁慘相信佢哋都始料不及。
其實今次事件,新聞處處長蔡瑩璧之前實在不知情,後來同班手足想補鑊,只好齊齊猛打電向各傳媒saysorry,又第一時間即晚作檢討,搵番張馬仔鞠躬相發通街,希望平息眾怒。有特區官員講,大家要好好吸取今次教訓,一切向前看。但願如此啦。



傳真︰2623-9278
電郵︰[email protected]