銀行家經常同客戶傾生意，飲得兩杯者大不乏人，唔講唔知，原來滙豐銀行員工私下都設咗個飲酒會，據元老之一嘅工商業務助理總經理陳力生講，呢個劉伶會嘅歷史，要追溯到十多年前滙豐觀塘分行。獅子行前副總經理劉智傑，及已調任恒生副董事長兼行政總裁嘅前執行董事柯清輝，都曾喺該分行工作，兩個都係飲得之人，於是志同道合就孕育咗呢個會。
飲酒會不論職位高低，只以酒量論英雄，目前約有十多名創會成員，全屬華人，曾試過最高一次紀錄，十四人喝咗十五支紅酒，另加威士忌、拔蘭地同五糧液數支。不過，佢哋都係每逢正月初七人日，先聚首一堂切磋酒藝，平日就梗係專心搵錢啦。
女將之中，原來外形嬌柔嘅香港區個人理財業務主管薛關燕萍薛太，竟然係元老級人馬，果然真人不露相。

傳真︰2623-9278
電郵︰[email protected]