黃秋生新唱片《BadTaste》中附送的扮嘢寫真集，早前已將郭富城及陳曉東形象玩到天翻地覆。唱片推出在即，他再度使出扮嘢本色，今次要埋手的是形象百變的鄭秀文，秋生更將對方玩到流血做賣點。

黃秋生明日推出的新大碟《BadTaste》中，將隨碟附送模仿多位歌手的唱片封套造型寫真集，他除將百事郭富城扮成「腩肉城城」、及將擘腿東東（陳曉東）變成搞笑的「爆呔東東」後，樂壇天后鄭秀文（Sammi）都難逃一劫，秋生把Sammi《ShockingPink》一碟中的粗眼線配火辣紅唇形象，變成「鼻血天后」。

扮Sammi扯火
秋生為了傳神地演繹Sammi的造型，不但要花個多小時學她畫粗眼線，還要扮Sammi做出露齒的性感效果，不過人家是露出性感的上齒，他則以煙屎牙示人。秋生昨日說：「我已經好努力露上齒，但整極都整唔到，先知道Sammi上顎啲牙原來咁大隻，最後露唔到上齒，咪惟有露下齒囉。重有佢條化到好似做大戲嘅眼線，先至搞到我扯火，個勾位化咗個幾鐘先搞得掂，扮佢真係好鬼煩！經過今次，我都服咗Sammi。」
而霆鋒的《玉蝴蝶》一碟在秋生的「改造」下，原先手拿油燈的他頓時變成左手揸蠟燭、右手持皮鞭，極有《人肉叉燒包》變態佬味道的「SM霆鋒」。