機會嚟啦，飛雲！又係召喚各路爆機兄弟嘅時間！如果你自問喺機舖鍊車無敵手，分分鐘鍊到份F1麥拿侖筍工返嚟，雖然未去到可以好似艾朗素或者雲杜尼咁正式坐落F1賽車度馳騁賽道，但麥拿侖呢次舉辦「世界最快車手」電競挑戰，就開出一年模擬器車手合約畀優勝者，將會喺英國總部以至走遍世界各地賽道，幫助研發新車咁話。

麥拿侖車隊總監薩克布朗表示：「呢個係絕佳嘅時機，以從未探索過嘅方式連繫賽車同電競世界。優勝者絕對係麥拿侖車隊嘅重要一員，真確無誤，我哋喺兩個模擬器平台上絕對需要額外支援，所以整個比賽同遴選過程一定係引人入勝，精采刺激。」車隊將會邀請電競界專業人士挑選6位高手，餘下4席就會透過今夏舉行嘅公開招募選出，10位車手到時就會接受為期5日嘅遴選面試，剩番一位脫穎而出！