當年今日

  鄭大班為企人邊企硬 - 李八方

蘋果日報 2002/06/04 00:00


邊個話香港人冇原則?為咗一個字──嚴格講係為咗一個字有冇邊嘅字,一班文化名人可以鍥而不捨,經年爭取,搞到「超級硬淨」之葉劉淑儀亦舉晒手。
一切爭執皆因個「份」字,呢個字究竟應唔應該有企人邊,係「身份」、「部分」、「分子」,還是「身分」、「部份」、「份子」,一直爭議不休。以往港府同香港四大報都用冇企人邊嘅「分」。最近《蘋果》已經唔再堅持,點解?因為「反冇企人邊派」實在太強太煩太有毅力。

政府冇立場
據八方所知,佢哋除咗游說傳媒用有企人邊嘅「份」,亦不斷游說其他大機構,例如恒生用「分」,就想辦法去令恒生改。中銀用「分」,佢哋又打電話去;最近重踩上保安局,搵葉劉淑儀講數。
原來,政府計劃改用智能身份證,有條草案上立法會,於是「反冇企人邊派」在張文光率領下,陸離、容若、鄭經翰、香樹輝、楊凡等,浩浩蕩蕩操上保安局見葉太及首席助理局長朱經文,希望條法例內之「身分證」寫成「身份證」,到時要恢復「身份」就事半功倍。
佢哋會否成功,條草案一出街大家就知。聽保安局老友話,其實佢哋都冇立場,「身份」定「身分」冇所謂,如果律政司肯劃一,葉太都唔會反對。不過,如果現在唔郁,到的新「身份證」發晒時再改,就要使好多錢了。


傳真︰2623-9278
電郵︰[email protected]