全港首名全職故事人與孩子齊創作童話
蘋果日報 2002/05/03 00:00
「豆丁經過咗100道橋、200條隧道、300個車站，就去到……」著名舞台劇編劇阮志雄正跟一班幼稚園生說故事。說得更到肉一點，是全港首位全職故事人雄仔叔叔在講古仔。再換個深層次的角度講，雄仔叔叔從事的是藝術教育工作。咦？故事書呢？雄仔叔叔會同你講：「我咪係本書囉！」只見他七情上面，身體、聲線等配合得恰到好處，逗得小朋友們哈哈大笑！既是無書，故事主人翁豆丁沒有去不到的地方，尤其是豆丁長途跋涉過了300個車站，他去到的是小朋友現實或夢內也曾到過的地方，實行與孩子齊齊編織童話。
記者：吳佩璇 攝影：伍慶泉 鳴謝：香港電台
記者：吳佩璇 攝影：伍慶泉 鳴謝：香港電台
夜半時分，豆丁的床前多了道門，門一開，竟然有一列火車。豆丁於是以枕頭作行李，收拾細軟便起行。第一站去到朱古力遊樂場，途中又有撞鬼經歷。這個《豆丁開門》故事，最發人深省的是豆丁去到一個山洞，洞內有一排排櫃桶，一打開，全是豆丁不見了的東西。原來我們遺失了這許多！成人世界更是充滿追悔！但雄仔叔叔說得斬釘截鐵：「我最怕帶Message！當然我有我嘅用意，但故事係自然流露，係小朋友嘅經歷。」事實上，長約1小時的故事，中段有不少時間讓小朋友講述自己與豆丁類同的經歷。如此互動的注入屬於小孩的故事，才最引人入勝。
故事既能引起共鳴，也就能窺探兒童的內心世界。說了8年故事，雄仔叔叔最難忘一個新移民小朋友，說自己的願望是媽媽可從惠州來港跟家人團聚。甫說畢就哭了出來！場面一度不知如何收拾！還是其他的同學仔聰明，說：「不如我哋齊齊寫封信畀佢媽咪。」於是雄仔叔叔帶領小朋友，用身體語言寫了封信。雄仔叔叔憶說：「我望一望個細路女，見佢笑番，嗰一個Moment我好Touch！雖然我哋幫唔到佢，但就畀到佢抒發內心情感。」
就是帶有這份醒悟，雄仔叔叔於1994年毅然放棄穩定職業，成立「慢慢走故事坊」，做個全職的講古人。沒有正常收入，更遑論退休、強積金，值得嗎？「基本生活其實重Survive到，而我老婆亦有一份收入OK嘅工。加上當年香港重好富裕，冇理由Support唔到我一個咁嘅人啩！」不過，追尋理想的更大動力源自由心生的熱愛：「因為開心！好似注定自己係要做呢樣嘢咁。」在此之前，他曾是中學英文科教師，也加入過中英劇團。劇團的經驗可說是現在的前奏，至於教書生涯則不是味兒：「教書我覺得好Frustrated，只係講Thisispresenttense！教書冇一種醒悟，我哋嘅教育畀唔到更闊嘅學習空間。」
故事人這行業畢竟太新也太陌生，全情投入以後，雄仔叔叔遇過不少挫折，如有學校認為「小朋友嘅專注力只得6分鐘，佢哋可唔可以聽成個鐘頭古仔呀？」、「吓？要收錢㗎？」……然而日子有功，種種的不信任經雄仔叔叔的努力一一化解。他發信到不同的幼稚園推銷自己的服務，也用心去度不同的故事。連《豆丁開門》總計有5個古仔及一些短故事。後來慢慢建立了口碑，並成功申請藝術發展局的資助。現時他每年要巡迴演講百多場！於幼兒教育界具相當的知名度。只是，雄仔叔叔今年已48歲了！故他已於今個學年找來兩個幫手，為全職故事人這行業加了點聲勢。同時亦出版了一些故事書，分享創作和經驗。往後的日子，雄仔叔叔說：「希望可以成立一隊Storyteller。」繼續編寫美好的故事內容！
救世軍平田幼稚園
梅英花校長
「搵雄仔叔叔嚟講古仔係因為其他嘅姊妹學校推介。聽完之後覺得佢個內容好豐富，抒發到小朋友情緒。佢嘅專業畀到我哋好多提示，例如講故事可以透過身體、聲音嚟講，更重要係用開放嘅態度融入小朋友嘅世界。」