美國政府終於出手拯救兩房，消除市場對兩房前途的憂慮，刺激全球股市大幅造好（內地A股例外），持有兩房債券的金融機構，股價亦大幅上揚，例如滙控（005）便高收123.7元，大升6.4元，升幅5.4%；中國銀行（3988）亦高收3.48元，升0.18元，升幅亦係5.4%，成交更大增到7.5億股。
港股高開，全日承接力都好強，仲以接近高位收市，恒指大升860點，收20794，升幅4.32%；期指更急升1033點，收20726。雖然A股下跌，但國企同中資股亦飆升，H指重上11000點大關，收11136，大升440點，升幅4.12%，大市成交684億元。上升正股超過520隻，但下跌正股亦有310多隻，大價股行先，股仔仲發緊呆。
港股急跌復又急升，兩個大裂口，形成小島轉向，只要短期內唔下跌補番個裂口，咁中期轉向就可以確認，恒指有機會上返23000點，但長期跌勢未完，彈完後，會再尋底。
轉向若確認，反彈市勢可望持續兩三個月，大價股照例先行，之後股仔會接力。現時好多股票嘅預測PE只係幾倍，另外唔少股仔亦已由高位跌咗8至9成，只要市場氣氛好轉，呢兩類股票一發力，升幅都會好勁。

大摩睇好　目標5.23元

在6行之中，中行上半年盈利增長43%，係最低一間，主要係受美國次按危機影響，中行上半年獲利421.8億元人民幣，為次按減值已達207億元人民幣。到6月底止，中行持有兩房債券106.3億美元，到8月25日，已減到75億美元；另外兩房擔保住房抵押債券則減少至51.7億美元。
事實上，中行所持的債券財務風險已降到合理水平，美國政府接管兩房後，情況會有所改善，起碼不會再壞，而市場預期其下半年或要大舉為債券減值的情況，相信亦不會出現，故整體來說，相信下半年的盈利增長，應會比上半年有進一步表現。
估計中行08年盈利可達870億元人民幣（下半年賺448億元人民幣），每股盈利35分人民幣，折40港仙，以12倍PE計，目標價為4.8元。大摩同美林睇得最好，目標價分別為5.23元及4.85元。