當年今日

阿仙奴有24億可以用 基奧特灰咗

蘋果日報 2015/07/24 06:00

阿仙奴雲格基奧特

據《ESPN》報道,阿仙奴總監夏里士話球隊個戶口入面有2億鎊(約24億港元)可以用,仲暗示兵工廠可能以破球會紀錄嘅轉會費買一個前鋒返嚟!雖然英國傳媒廣泛報道,阿仙奴已經同法國鋒將基奧特續約到2018年,相信佢嘅周薪會係大約130,000鎊,但依然唔會阻止到球隊買前鋒嘅計劃,而事實上如果球隊要賣一個球員,就算續咗約都冇話唔賣得嘅!

夏里士係咁講嘅:「啱啱搬去阿聯酋球場果陣真係無乜錢,依家唔同晒咯,我哋銀行有2億鎊,只要雲格有想要嘅人,佢就可以買佢返嚟,除咗美斯同C朗買唔到之外,幾乎乜嘢球員都買得到。雲格真係想買個前鋒嘅,不過我唔會講係邊個,因為都要第二隊肯賣至得。我相信個球員係想嚟嘅,但對方球隊都要搵到個超級球星做替補先會放人,因為佢哋唔等錢使。」