唔知係咪真係新不如舊呢，通常啲乜乜調查或選舉，名列前茅嘅都係一啲已故或者幾十年前紅透半邊天嘅藝人，而最近英國嘅UCI院線所進行嘅調查，亦得出呢個結果。調查叫當地嘅觀眾選出心目中至喜愛嘅金髮女星，結果荷李活一代性感尤物瑪麗蓮夢露（MarilynMonroe）榮登榜首，已故摩納哥皇妃嘉麗絲姬莉（GraceKelly）同碧姬芭鐸（BrigitteBardot）兩位經典女星分列二、三位。

荷李活黃金歲月
六二年逝世嘅夢露憑住佢一頭招牌金髮，攞到百分之四十五嘅選票，大比數獲選為史上最受喜愛金髮女星，而我羅拉發覺頭三位嘅女星有一個共通點，就係佢哋都喺五十年代紅極一時，當年佢哋嘅一舉一動，都備受世界各地嘅影迷注意。而UCI嘅發言人亦表示今次嘅結果顯示大家對荷李活嘅黃金歲月仍然好懷念。
不過近年嘅女星其實都唔輸得晒，幾位九十年代女星姬妮芙柏露（GwynethPaltrow）、莎朗史東（SharonStone）同金美侖戴雅絲（CameronDiaz），都分別入圍五、六、七位，都算係有個交代喇。