噚日係「世界地球日」，推廣素食嘅Green Monday，搞咗個頒獎禮兼慶祝成立一周年，鷹君（041）有份冠名贊助呢項活動，主席羅嘉瑞現身支持兼做頒獎嘉賓，原來佢都有食齋嘅習慣，每個星期一通常素食，但就自爆食齋係俾四個仔女迫㗎！
羅嘉瑞話，𠵱家有七、八成時間食齋，「因為四個仔女近幾年食齋，有兩個仲係連牛奶都唔飲，所以我返到屋企都迫住要食齋」。

66歲嘅羅嘉瑞除咗肯為仔女食齋外，仲係廿四孝阿爸，唔會強求仔女打理家族生意。羅嘉瑞4年前講過，兩位愛女醉心藝術，喺外國修讀電影，冇興趣做生意。大仔畢業後加入銀行界，細仔今年就19歲左右，之前曾經喺香港某間英文報館做實習記者。

一向支持Green Monday、早排有份走去跑北極馬拉松嘅康宏（1019）主席王利民，亦係每個星期一食齋，出名鬼馬同鍾意食嘅佢，踢爆自己成日唔記得邊日係Green Monday，「有時太大懵唔記得，好似之前去大阪，同老婆喺機場食咗碗牛肉飯，先醒起嗰日係星期一！」佢又話素食咗半年，暫時見唔到有乜改變。

李華華
mailto:[email protected]