因為更改年結日期，星島成為第一隻公布業績報業股，由舊年四月到十二月九個月內，星島蝕咗六千五百七十幾萬。之前十二個月，星島不過蝕六千二百幾萬，𠵱家九個月就蝕成六千五百幾萬，可以睇到報業經營幾困難。
星島母公司泛華科技亦同一日公布業績，九個月蝕一億三，泛華蝕咁多，佢話係因為為短期投資及物業作撥備，加上土地及樓宇重估虧損，同埋星島業務重組及裁員成本拖累，所以蝕咁多。
泛華又話，星島在國內已展開業務，又收購咗《東Touch》同《Teens》兩份年輕人雜誌，重有將《iMail》定位為以大中華地區為主嘅財經報章，又成立多媒體部門。雖然市道麻麻地，但星島都繼續擴展，對媒介人都算係好消息。
其實今年底，星島再公布業績時，盤數應該會有改善，因為星島將商業印刷業務賣咗，套現四億二千八百萬，其中一億四千幾萬係盈利，將會入帳。


E-mail：[email protected]