上個禮拜五晚美股又再跌過，原因係微軟及IBM第4季業績欠佳兼前景看淡。美國公司業績公布期，美股難免受業績影響大幅波動，令港股將更加難玩。
以技術走勢分析，納指隨杜指之後，上個禮拜五亦跌穿50日線（現處1956），短期如果唔能夠重返其上，亦代表科技股再次進入調整，短期應暫時避開科技股。
上個星期市場氣氛偏淡，但樓盤銷情未見明顯轉弱，睇嚟如果大市要繼續守喺萬一關附近，地產股或會成為支撐大市嘅主力。不過睇番大部分地產藍籌嘅走勢圖，目前最「強」嘅係新地（016）、新世界（017）及太古A（019），其實所謂「強勢」亦不過係未跌穿50日線而已。

月底料再減息
地產股長線當然係買新地，不過𠵱家未到吸納時，新地若跌穿50日線61.70元，估計會先下試55元支持位，而較強支持位喺去年10月49元橫行區。
短炒則可優先注意新世界，隻股彈跳力特別強，同埋現水平短炒容易轉身。估計聯儲局月尾會減多一次息，新世界最受惠減息，有藉口造好，短炒可在6.50元附近吸納，跌穿6元宜先止蝕。