美股破阻力，淡友瞓唔着。上周五杜指再升87點，收10259。杜指升破250日線（現處10207），而納指在上周四稍為升破250日線（現處2033）後，亦進一步做好，升0.8%，收2059。相信唔少揸重咗淡倉嘅投資者，今日晨早就要趕住平倉，港股勢必高開，估計恒指會喺萬二關前徘徊，睇埋美股今晚有冇回吐。
恒指若升破萬二，下一目標自然係250日線（現處12581），同恒指走勢關係密切嘅滙豐（005）、中移動（941）、和黃（013）、長實（001）、恒生（011）、新地（016）及聯通（762），佢哋嘅250日線分別喺95.80元、34.30元、78.50元、81.80元、88.45元、68元、及10.60元。除咗兩隻大陸電訊股外，其餘幾隻主要大藍籌嘅現價都距離250日線相當近，留意佢哋會否升破250日線阻力，對恒指後市走勢會有重大啟示。

短期上升空間較大
撇開中長線基本因素，若大市上試12600，中移動上升空間較大，短炒可睇高一線。趙飛雲都打算買啲中移動短炒，首個目標30元，破位上望32至34元，跌穿50日線（現處26.80元）止蝕。