當年今日

Angela話尷尬 阿Sa話無嘢
Cookies學Twins唔怕認:好嘢先抄

蘋果日報 2002/08/11 00:00


Twins昨日出席活動,對於有指九人女子組合Cookies自出道以來,形象和宣傳策略均和Twins十分近似,亦有傳Cookies其中一位成員把蔡卓妍的私人照曝光。Twins昨日指大家各有風格,而Cookies則大方承認:係好嘢先抄。
九人女子組合Cookies以水着look宣傳兼打觔斗,和Twins出道時的宣傳招數十分相近。有傳Cookies成員Angela更把和蔡卓妍(阿Sa)合作拍電影《自從他來了》的私人照片,提供給雜誌刊登。

「我哋冇不和」
Twins昨日往黃大仙宣傳,兩人對此說:「講到我哋好輕易,其實好辛苦先有咁嘅成績。而且大家走嘅路線唔同,各有各宣傳,大家都係獨立個體,唔好比較啦!」
而阿Sa則表示與Cookies的Angela見面不會尷尬,她說:「我哋冇不和,我哋唔同公司,我哋喺同一間髮型屋整頭,見到面有打招呼!」

「嫌疑犯」欲解釋
Cookies昨日往紅館出席港姐活動時,成為提供相片「嫌疑犯」的Angela說:「其實當時影相嗰班人,大家有keep一份,自己嗰份唔知放喺邊啦!𠵱家搞到好尷尬,有機會會同阿Sa解釋。」Cookies被指和Twins宣傳招數相似一事,成員Serena說:「係好嘢先抄,俾人話我哋似Twins好榮幸㗎!佢哋有今時今日,值得學習啦!」
另外,有雜誌指Twins現時收入高達四千萬,遠超樂壇天后鄭秀文,阿Sa昨日說:「我諗冇啩,如果係阿媽一早話我知。」她們謂若賺到錢,阿Sa欲買樓,而阿嬌則欲考車牌。
採訪:卓寶花、王連連
攝影:陳志嵐、黃文成