十九歲嘅磯山沙也加，係日本近排冒起得最快嘅「童顏巨乳系」性感女星，我大口羅拉記得磯山講過，佢未紅嗰陣時出街，重有人以為佢係小學生。
不過，磯山絕對唔甘心只係喺鏡頭前扮小妹妹冧fans，最近佢就步前輩根本春美後塵，為雜誌扮鬼扮馬，拍咗一輯嘅性感又搞鬼、具有故事性嘅寫真。

造型馬虎
磯山喺輯寫真入面一人分飾兩角，佢扮演太空女戰士之餘，又要扮成太空異形，但磯山呢個異形造型相當求其，除咗着件紅色比堅尼，或者喺個胸同下體加啲發光效果外，頂晒籠就係戴咗個紅色假髮，極之粗製濫造，個樣睇嚟重有啲似MEGUMI㖭。
至於輯相就係講異形版嘅磯山，上咗架太空船入面搞搞震，佢無論穿牆定係好似蛤蚧咁走壁，抑或太空女戰士版嘅磯山同佢搞對抗嗰陣，都係純粹賣弄身材，十分造作。
原來磯山沙也加已經獲邀參演十月開始播放嘅超人戰隊劇集《超星神Granseizer》，重喺入面扮女戰士，呢輯相都可算係畀佢熱吓身。