當年今日

免費駐顏術

蘋果日報 2003/01/21 00:00


化妝間內除了聽到好多八卦新聞外,其次便是扮靚貼士。最新的水貨往往成為爭相試用的寵兒,但係我亦聽到好多唔使錢嘅無敵秘笈。
秘笈一:喝熱飲
經常手冷面青嘅歐陽妙芝最近面色紅潤,穿上小背心時也不畏寒風,原來中醫師曾吩咐她任何時候都只可喝溫熱飲品。自從改變飲食習慣後,她果然變得容光煥發。而另一人辦陳嘉容,每逢在影樓時都必會叫熱杏霜外賣,所以她皮膚又白又滑。
秘笈二:拍打臉龐
去年在葉德嫺小姐演唱會中,碰到勁Young嘅寶珠姐,見到佢Keep得咁靚梗係要問吓佢嘅駐顏心得。佢話每晚都會拍打臉龐至少二百下,作收緊皮膚功效。我就試過肚腩拍打法,雖然無減磅,但係好似真係Firm咗!
秘笈三:用毛巾印面
由於我好貪靚,小時候外婆就教我唔好用毛巾擦面,冲過水後用毛巾輕印才可保持嫩滑。另外還有我自創嘅寒冬護面心得,就係喺晨早起身時,只用evian水噴至面部全濕,之後用毛巾印乾再搽Cream,保證皮膚唔會過敏及「乾爭爭」。

作者簡介:GaryChung──國際美容品牌創作顧問,曾為蔡少芬、鍾麗緹等紅星化妝