隔牆有耳:
三歷史建築升呢法定古蹟 - 李八方

蘋果日報 2017/10/14 05:20

隔牆有耳法定古蹟跑馬地東蓮覺苑油麻地九龍佑寧堂大澳楊侯古廟

再多3幢歷史建築「升呢」做法定古蹟,政府宣佈將跑馬地東蓮覺苑、油麻地九龍佑寧堂同大澳楊侯古廟列為法定古蹟,噚日刊憲3幢建築物喺今年6月已獲得古諮會列為法定古蹟,有咗法定保護,就唔擔心日後被貿然拆卸,政府仲會協助維修同提供保育意見。
3幢建築同唔少本土歷史息息相關,東蓮覺苑係1935年落成嘅佛寺,由何東爵士同佢佛教徒妻子何張靜蓉創立,為弘揚佛法而建,東蓮覺苑採用咗西方建築結構糅合傳統中式設計,例如飛檐、斗栱、琉璃瓦頂等。
九龍佑寧堂就由倫敦傳道會興建,1931年正式揭幕,日佔時期曾經被日軍改做馬廄,亦被大肆破壞,到1947年先重開,教堂帶有垂直哥德式建築風格,亦建有中式金字瓦頂。大澳楊侯古廟就建於1699年或更早,係大澳現存最古老嘅廟宇,因與大澳端午龍舟遊涌關係密切而聞名。