一直喺練馬師榜末嘅吳定強同胡森，一齊打疊兩個賽日交出頭馬，距離成功達標上岸可以話跨出一大步。下游倉嘅鬥志有時真係比爭冠軍嘅大倉更好。
目前仲有五個倉未夠數，已經收過兩次警告信嘅李易達，再肥佬就冇得留低，暫時仲爭一場頭馬就上岸，若然喺剩低嘅賽日都贏唔到多一場，咁就真係死得抵。上次夜馬「永常勝」同「其樂無窮」兩隻大熱都明刀明槍搏命，可惜差啲運氣。其實哥距離馬會酌情達標要求嘅1,500萬獎金，仲爭成接近500萬，點計都係快啲贏多一場甩身最實際。
下游倉彈藥有限，當然計較賠率，熱倒冷爆嘅情況司空見慣，亦令到好多馬迷唔鍾意呢啲馬房，多少有睇你哋點死嘅心態。最難捉摸嘅胡森，最近兩次先後爆出「歡欣滿載」同「精彩時機」，兩隻都贏到大超班咁，已經收過警告信嘅肥胡，似乎開始認真做嘢。
暫時最似走唔甩嘅，相信係贏得七場馬嘅孫達志，最大鑊係馬房得28隻馬，要交多八場頭馬一啲都唔易。仲有兩個要追數嘅華人倉，吳定強養馬都係33隻，好唔過老孫幾多，不過佢係護級專家，唔少馬評分有利，又唔使睇死佢。反而鄭俊偉上季僅僅過骨，今季不進反退，話晒有成40幾隻馬，揀今季最失望馬房，都非佢莫屬。

阿Joe