金管局總裁任志剛5月4號上立法會，解釋吓金管局本年報，同埋例行答問，白鴿黨嘅單仲偕（圖）等唔切，率先喺上星期日向該局開火，不過今次焦點唔係任總人工，而係局方嘅營運開支不斷咁升，同外滙基金投資回報成反比，總之一句講晒，就係唔妥佢哋成日用外滙基金條例做擋箭牌，唔將每年預算開支攞畀立法會審批。
根據單議員計條數，該局撇除薪酬及物業嘅營運開支，由97年1.86億元，到去年增加超過三倍半至8.11億元，外聘基金經理啲託管費亦水漲船高。
不過，金管局發言人噚日同華華補充，話經佢哋研究過後，單議員嘅數據有誤解，至於係乜嘢誤會，公關大員就賣關子，話留番喺下個禮拜嘅財委會會議解答，仲有佢哋嘅行政開支，每年年報都公布預算，唔係十八個月後先呈報喎。