國際七人欖球賽花絮

蘋果日報 2002/03/25 00:00


肥佬裸跑贈摩國興
香港國際七人欖球賽嘅餘興節目,又點少得裸跑呢個環節,噚日摩洛哥贏得銀碗冠軍後,竟然有個肥佬走出嚟,博大霧同摩洛哥球員一齊慶祝,點知肥佬㷫起上來突然剝光豬「裸跑」,最後遭警方帶走,須罰款贖身。

球迷得半晝醒神
噚日上午大球場有一段時間陽光普照,球迷睇波亦非常醒神,一聽到大會播放勁歌,幾乎人人都起身手舞足蹈一番。不過到下午四點幾,個天突然烏雲蓋頂,之後更落滂沱大雨,搞到班球迷四圍避雨,睇決賽都冇晒Mood。

加演人狗情未了
大會為搞氣氛,噚日就特別邀請香港警察同中國駐港解放軍兩支銀樂隊為場內觀眾演奏;另外,重有由八隻醒目警犬組成嘅隊伍,與銀樂隊合演一場「人狗情未了」,雖然可觀性不高,但見到幾隻警犬咁有紀律,都值得鼓掌支持。