這天第三場四班草地1200米，徐雨石馬房質新馬「魅力之子」現年四歲，上季已來港，今季開始出賽，之前六場都用唔同騎師，呢鋪繼續換人，並由當紅女將蔣嘉琦接手減十磅，結果「魅力之子」俾女子收服，半條直路後上逢馬過馬，反勝原本走甩咗的落飛馬「綫路神駒」，爆9.1倍半冷開齋，組合獨贏A2派42元，「魅力之子」大勝三又四分一身位，是嘉琦在港贏馬最遠紀錄，嘉琦父母亦有拉頭馬。
嘉琦BB在港累積16場頭馬，贏多四場就可以升格改減七磅。蔣嘉琦在港開齋馬是徐廐「頌友」，贏馬日期為舊年10月10日，事隔半年，這天佢再為徐雨石建功，賽後騎練皆表現得相當興奮。
今場「綫路神駒」由韋達前置跑第二，三、四名由半冷門「快樂火龍」及224倍全場最冷的「永常喜」瓜分，四重彩107,951元。
徐雨石有徒弟黃皓楠，為何「魅力之子」用蔣嘉琦？原來是馬主鄧偉彬建議。鄧偉彬說：「蔣嘉琦近期是大紅人，她是位很努力的後生女，我和家人都樂於支持他，今次是我建議起用嘉琦，我對石哥表示，既然嘉琦早前策騎此馬贏試閘，人馬應合拍，何不用她呢？石哥也接受我的建議，我們一家人都會繼續支持嘉琦妹。」