由韓國神劇《太陽的後裔》女星宋慧喬孖朴寶劍主演嘅tvN新劇《男朋友》上周三首播，收視成績十分理想，上周四播出第2集收視即破雙位數。《男朋友》噚晚播出第3集，內容講到朴寶劍飛車去見喬妹並向對方表白，雖然收視微跌至9.251%，但仍然成為收費台、免費台所有劇集中嘅收視冠軍。

《男朋友》將於今晚播出第4集，港迷亦可於「黃Viu煲劇平台」同步追睇。而第4集嘅預告中可見，雖然朴寶劍勇於向喬妹表白，但喬妹就拒絕對方，並表示唔想同朴寶劍有更多關係。由於喬妹與朴寶劍傳出緋聞，公司就有傳言稱喬妹利用職權令朴寶劍通過面試而入職，令朴寶劍嘅好友相當心痛及擔心，而喬妹嘅秘書兼好友亦去搵朴寶劍叫佢死心，點知朴寶劍就表示：「我覺得一個人能令另一個人心動，係有意義嘅事。」似乎暗示朴寶劍唔會放手。而預告嘅尾聲，朴寶劍捉住喬妹隻手，強調自己鍾意喬妹並唔係玩玩吓，但喬妹仍叫朴寶劍唔好再靠近佢。

精選韓流，喺晒《娛果》
http://fb.com/appledailyent