《易經》代表中國傳統文化，塔羅牌則代表西方占卜文化，兩者本無相同之處。但在英國留學，主修化學工程的張光賢，卻忽發奇想將兩者結合，推出一副名為「易經塔羅牌」的占卜工具，這套紙牌的功用，竟同時得塔羅牌專家及《易經》專家認同，達成一次完美的中西文化結合。

記者：朱文俊　
攝影：陳盛臣、陳穎

觸機啟發靈感
同所有新產品一樣，這副牌亦同時被傳統《易經》專家質疑它的功用，對此，張自有他的看法：「其實《易經》係非常科學，每一次占卜結果都唔一樣，因為每一件事其實都喺度變緊，唔同人去解釋亦有唔同結果，因為佢畀出嘅答案，唔係YesorNo，而係畀你一個靈感，術語叫做『觸機』，等你根據當時環境去作出判斷。占卜準唔準，並非睇你用邊種工具，而係你對世事夠唔夠了解。中國有句說話稱『善易者不卜』，如果你精通《易經》的話，根本唔需要用占卜去解決疑難，不過，試問喺今日社會，有幾多人識得睇《易經》？所以我選用圖像表達。試過一次，我喺天星碼頭一間書店做推廣，有位外國女人買咗副牌，然後佢喺我面前占卜，問題係佢喺紐約嘅屋企人叫佢返去。但係佢又唔想返，抽出來嘅牌係「震卦」，圖像係一座塔被雷擊中，斷開兩截，我解釋佢聽，震嘅意思係Shock(震盪)，然後冇耐，就發生「九一一」事件，原來結果已由圖像顯示出來。呢種就係觸機嘅厲害之處。」

傳統易卜勁繁複
《易經》被稱為群經之首，相傳為伏羲氏所創，其中解釋的「卦辭」（以文字解釋卦象），由周文王被紂王所囚時所作，加上周公所作的「爻辭」（每卦象所顯示的故事可分為六個階段，爻辭正解釋每個階段的狀況），《易經》建立大致完成。
古時《易經》占卜的方法，是先取五十根蓍草或蘆葦草在手，先抽出一根棄掉，再抽一根留用，另四十八根隨意分為兩份，每份每四根組成一堆，接着，將兩份所得之餘數（沒有餘數當四根）相加，再與留用的一根加起來，單數代表陽爻（——），雙數為陰爻（——），六根草代表純陰爻，九根草為純陽爻。以上程序重複六次，才可組成一個卦，再憑此卦象從《易經》找出占卜結果。

測試大比拼
羅兆輝究竟有冇病？
為測試「易經塔羅牌」與塔羅牌的差異，分別請來塔羅牌專家Fanny及「易經塔羅牌」始創人張光賢，以傳統塔羅牌及「易經塔羅牌」占卜近日鬧得滿城風雨的話題：「羅兆輝究竟有冇病？」。