當年今日

郭令海接棒南順等發圍

蘋果日報 2006/10/13 00:00


噚日華華先講完南順主席黃大椿開完大會冇特別嘢講,點知原來佢喺會上宣布榮休,噚日開始唔再做主席,連副主席伍秉堅都話要退休㖭,咁都叫做冇特別嘢講?
除咗阿仔非執董黃上哲上位之外,仲有邊個夠資格呢?睇番通告,先知道阿仔個職位冇變,新任主席反而交咗畀親家──即係黃上哲老婆個哥哥,現任非執董兼薪酬委員會主席郭令海。
郭令海嘅來頭認真唔嘢小,除咗係南順非執董之外,仲係另一間上市公司國浩集團嘅行政總裁,最出名嘅事迹,莫過於5年前,以當時收購價作價逾3倍嘅天價,出售道亨銀行(現稱為星展香港)畀新加坡發展銀行,套現超過300億,賣嘢掌握時機之準確,令人拜服。南順近年嘅業績都唔錯,股價喺一年內都升咗88%。唔知今次郭生有咩神機妙計,令南順攀上巔峯呢?