奇聞！鬥牛㹴跌咗落「坑渠」！意大利國腳加度素向來鹵莽，周日呢隻「鬥牛㹴」終於出事，跌傷左手缺陣一個月；教練納比睇住手下班傷兵，分分鐘以為周三參加嘅係殘疾人世界盃外圍賽！
話說周日意大利喺熱身賽11:0大勝地區球隊巴列堤，加度素當正個業餘球場係聖西路，搶完波一路向後跑眼尾又唔睇後面，教練納比都篤佢背脊提醒收步，可惜背肌太厚feel唔到。結果就傳來一嚿肥豬肉撻落地咁嘅聲，所有人即時望向後備席，睇到加度素左手腕僵硬，對眼仲想殺人咁款！
原來，後備席有個着白衫嘅職員打躉，點知呢條友掛住睇波，唔記得提醒加度素釀成大禍；教練納比同軍醫卡斯特拉基見狀即跳入後備席，前者仲激動到怒擲皮球，眼尾射出火光飛向該職員。之後卡斯特拉基替加度素敷冰送院檢查，臨行納比仲拍拍對方塊面作鼓勵㖭。

「唞」一個月益法米尼

加度素證實左手多處骨裂，仲喺當地醫院完成手術。卡斯特拉基話：「好彩嘅一個月後就可以復出。」教練納比探完病冇回答記者提問就離去，失望之情盡在不言中。又係嘅，甘巴連尼同格羅素喺上場險勝塞浦路斯2:1已經受傷，𠵱家周三對格魯吉亞好唔樂觀。
加度素呢次意外落坑事件，娛樂性豐富，其中最開心嘅係AC米蘭隊友法米尼，因為冇咗鬥牛㹴，佢就少咗個競爭對手。記得，聯賽揭幕戰加度素冇打，法米尼都一樣要客串右後衞，就知道AC中場位置真係爭崩頭㗎！

想睇加度素點落坑？

即上： http://www.sportmediaset.it/calcio/video/video1988.shtml