真係得人驚，中華城市燃氣（603）向和黃（013）與殼王發行可換股票據單deal喎咗，但股價重可以急升，睇落情況唔正常。睇完波返嚟嘅經紀黃話，睇見股價咁升法，加上成交量咁大，覺得非常之唔舒服，勸各位老友勿沾手。
中華燃氣噚日幾乎以全日最高位收市，收11.8仙，升36％，成交股數高達10.97億股，成交金額1.18億元，今時今日以一隻股仔嚟講，咁嘅成交真係唔簡單。
經紀黃話，自從中華燃氣喺大陸嘅合資項目搞到一頭煙之後，市場已經有傳聞，話與殼王相熟嘅大孖沙感到意興闌珊，所以紛紛沽貨鬆人。
今次票據交易告吹，傳聞再有一班炒家想鬆人，所以佢覺得隻股噚日急升，唔排除係有關人等想炒高股價鬆人。佢重話，就算隻股背後嘅上海炒家肯繼續玩落去，賺到嘅錢可能都唔夠買驚風散。
慕容小初