隔牆有耳:
袋巾推單車反袋住先 - 李八方

蘋果日報 2015/05/16 00:00


泛民主派為宣傳拒絕政改袋住先,噚日開完飯盒會後又諗到新搞作,包括呢個周日喺在中環3號碼頭集合,拉起有10國語言嘅易拉架,宣傳反對政改袋住先嘅訊息。飯盒會召集人傑哥指,當日易拉架除用10國語言外,仲請埋英語專家Miss Mo派英文單張,絕對唔會好似周融搞啲簽名咁,出現啲外籍人士話俾人呃咗簽名嘅情況。
另外泛民又會係再下一個周日(24日),用踩單車宣傳反袋住先,暫定先由樂富港鐵站踩到觀塘。由於單車行程唔係個個頂得順,加上當日預計會落雨,所以怕有交通意外嘅傑哥,講明佢當日會用「推車」代替踩車參加行動喎。