當年今日

以為好型點知好輪盡
馮仁昭四圍超:古仔遭巨浪偷襲

蘋果日報 2003/05/22 08:00


古天樂噚日由塞班島坐咗一個鐘船去天寧島拍唱片封面相,一行人行咗成半個鐘嘅崎嶇山路先可以去到懸崖邊取景,古仔重一支箭咁走到去崖邊,重諗住擺定個有型甫士影相。點知一個大浪冚過嚟,令古仔成身濕晒,佢着住嗰件白色衫即時變咗透視裝。

攝影師跣腳受傷
不過,幫古仔拍唱片封面嘅攝影師影相嗰陣,因為俾另一個好大嘅浪冚過嚟,搞到成個人失咗重心,跌咗落地下,古仔見到即刻埋去扶起個攝影師。噚日古仔話:「見到個攝影師手腳同個肚都俾岩石𠝹損晒,我就決定先同個攝影師返酒店療傷先,最初諗住崖邊影浪花會好靚,都唔知會搞成咁。」
記者魯萍塞班直擊

GiGi得閒狂寫歌
噚日梁詠琪(GiGi)去咗港台接受訪問,佢話呢排好得閒,本來今個月預咗宣傳電影《向左走.向右走》,但因為非典型肺炎問題影響,套戲要延遲到暑假先至上。GiGi話:「所以我呢排多咗時間喺屋企寫歌,下一隻碟應該有半隻都係我自己作嘅歌。」
城城護膚兼抗炎
郭富城近排簽約成為Clarins護膚品的首位形象大使,今個星期日重會喺銅鑼灣舉行一個記者會,一向對做善事不遺餘力嘅城城,要求廣告商撥出部份產品用嚟做慈善義賣,將收益捐畀抗非典型肺炎嘅「茁壯行動」,城城重話:「我好幸運,我所代言嘅廣告商都好支持我,令我可以將工作寓慈善,回饋社會。」

吳國敬爆安仔想成家
蘇永康同吳國敬前晚喺新城接受訪問,提到吳國敬下個月舉行嘅演唱會,被傳只係賣得三分一門票,阿敬前晚話:「𠵱家平飛賣晒,貴飛都去緊。」提到許志安同新人鄧肇欣嘅緋聞,康仔話:「個女仔都唔係許志安鍾意嗰類。」而阿敬就話:「係囉,同埋佢𠵱家想溫馨呀,鍾意家庭。」

阿姐擘髀跳拉丁
汪明荃(阿姐)噚日喺銅鑼灣一間排舞室綵排演唱會,原來阿姐會好似劉德華一樣,喺演唱會表演拉丁舞,佢重請咗台灣老師周志坤做佢拍檔,只見阿姐俾周老師拋上拋落,又擘髀又倒轉咁,認真精采。
阿姐之前捐咗以前做舞台劇嘅旗袍義賣,有歌迷以二萬蚊買咗後又將件衫送番畀阿姐,而筆錢會捐畀護幼教育基金。
田蕊妮為車牌勞氣
田蕊妮噚日喺亞視綵排台慶,最近杜汶澤買咗兩個車牌,其中一個送畀女友田蕊妮,不過佢就唔係咁鍾意,佢話:「我哋本身已經有一對車牌,但係就冇特別意思,佢早排突然同我講話投咗個HK1999送畀我,話嗰年係我哋拍拖年份,之後佢投埋XX1999,後尾俾我發現兩個牌要成九萬幾,激死我。」

梁漢文發燒嚇餐死
梁漢文噚日喺商台做訪問,佢話早幾日發燒、發冷重肚屙,十足十非典型肺炎嘅病徵,嚇到佢半死,梁漢文話:「不過我喺屋企食咗粒藥,着咗幾件衫,焗咗一身汗冇咁燒,但就不斷屙,所以我頂唔順去咗睇醫生,不過醫生話我只係腸胃炎。」