當年今日

馮仁昭四圍超:ILoveUBoyz喪寸娛樂圈

蘋果日報 2005/07/17 00:00


騎呢組合ILoveUBoyz前晚喺演藝學院搞咗個騷叫《歡樂滿Tour之娛樂大飲茶》,請咗古巨基、鄭融做嘉賓,佢哋成晚狂寸啲藝人,令全場觀眾狂笑。佢哋先暗寸女星經常扮唔覺意走光,又喺螢光幕播出多位男星嘅赤裸上身相,然後映出一點,叫鄭融估嗰一點係邊個嘅,答案竟然係薛家燕粒癦。
扮栢芝舉手指
少爺占又話啲明星成日露出胸部,佢話:「唔知點教細路,第時地理科測驗,問到南半球同北半球係點樣?」螢幕即播出章小蕙嘅相,笑死人。
跟住少爺占同Donald着住韓服扮大長今,少爺占重拎住個LV袋又戴頭箍扮李英愛訪港,Donald就扮宋芝齡做繙譯,少爺占之後再扮Rain出場跳舞,跳咗一陣就入番後台,由幾個着黑西裝嘅男人圍住出番嚟,急急腳扮Rain低頭行路,好搞笑。
ILoveUBoyz又話好多明星都做運動,少爺占話:「劉德華幾忙都做運動,郭富城演唱會晚晚都跳,諗住個高度可以高啲。張栢芝都成日做手指運動。」少爺占即舉起手指,笑栢芝成日做粗口手勢。
笑Twins冇身材
最後,古巨基扮主持人報新聞,佢第一則新聞話落好大雨,少爺占就話:「呢度有李蘢怡、姚樂怡,重有葉子楣」。Donald就話:「香港區冇雨落,蔡卓妍、鍾欣桐都咁啱喺晒度。」擺明笑Twins冇身材。
empty
少爺占扮阿Rain跳舞,睇嚟醜化成份居多。
empty
ILoveUBoyz同古巨基(右三)及其他嘉賓一齊謝幕,台上嘅人都幸免被嘲笑。